PIA Press Release
Tuesday, January 31, 2012Hiligaynon news: Katigulangan sa Capiz magabaton bakunani Jemin B. GuillermoSYUDAD SANG ROXAS, Capiz, Enero 31 (PIA) -- Kapin sa 1,318 ka mga imol nga mga katigulangan sa Capiz ang magabaton sang libre nga bakuna nagikan sa Department of Health. Suno kay Capiz Provincial Health Information Officer Joeffry Espiritu nga sumugod sining bulan sang Pebrero, magapatigayon sang pagpangbakuna ang tagsa ka mga banwa sa ila nasakupan nga mga katigulangan. Ang pneumococcal kag influenza nga bakuna ang patigayunon sa bulig sang tagsa ka mga Rural Health Unit, Social Welfare and Development Office kag Office of the Senior Citizens Affair sa tagsa ka banwa kag syudad diri sa Capiz. Ginpahayag man ni Espiritu nga ang 1,318 ka mga gatigulangan nga ini amo man ang benepisyaryo sang bulanan nga tag lima ka gatos pesos nga pensyon nagikan sa Department of Social Welfare and Development. Mahibaluan nga ang paghatag sang nasambit nga mga benepisyo sa katigulangan kasubong sang bulanan nga pensyon, bakuna, diskwento sa mga balaklon, pamasahe kag balayaran sa konsumo nga tubi kag koryente ang pila lamang sa ginasaad sa Republic Act 9994 ukon ang Expanded Senior Citizens Act of 2010. Sa pangkabilugan, ang paghatag pgtmod sa kaayuhan sang mga imol kag mga katigulangan ang santo man sa Philippina Development Plan sang administrasyon ni Pangulong Benigno S. Aquino. (JSC/JBG-PIA6 Capiz) | 
