PIA Press Release
Tuesday, January 31, 2012

Waray News: Pasilidades han DBP masuporta han edukasyon nga sektor ha pobre nga mga lugar

Hi DBP president ug chief executive officer Francisco F. Del Rosario, Jr. in nagsering nga an pasilidad in mabulig han pagpauruupay han sistema han panpubliko nga eskwelahan pinaagi hin pag-aghat han lokal nga pan gobyernuhan pinaagi han local school boards nga mamuhunan ha mga pasilidades nga makakapaupay han pag-aradman ha panpubliko nga mga eskwelahan.

Hiya in nagdugang pa nga an FPBE in magtatarget han higbubo an kita nga mga komunidad, sugad han 4th ngadto 6th class nga mga munisipyo ug 4th ngadto ha 5th class nga mga probinsya. “Tatagan namon hin prayoridad an mga rehiyon nga nga nanginginahanglan hin mga pasilidad ha eskwelahan sugad han Central Luzon, Southern Luzon, Bicol, Central Visayas, Eastern Visayas, ug Southern Mindanao.”

An pasilidad in magpopondo han pagkaada hin tuna nga may panuyuanan para ha eskwelahan, ug pagtindog ngan pag-ayad hin mga classrooms, library, mga laboratoryo, restrooms, mga pahalibwayan, study area, ug iba pa nga pasilidades ha eskwelahan. An LGU nga mangurutang in makakakuha han pondo para han pagpalit han mga gamit sugad han armchairs, desks, bookshelves, audio-visual equipment, transportasyon ug school supplies ngan mga materyales.

An pinakadako nga kantidad nga mauutang in tubtob 90% han kabug-usan nga kantidad han proyekto o an nagdaug nga tinawaran nga presyo, o kun hain an guruguti. Depende kun ano an klase han proyekto ug an kakayahan han pagbayad han kliyente, an pagbayad han utang in maabot hin 10 anyos upod na an duha ka tuig nga grace period ha principal. An kanan DBP 15 nga regional marketing centers, pinaagi han iya mga sangay, in nakarawat nah in aplikasyon ha ilarom han FPBE. (translated by GTT/PIA8/PCOO online news)